政府出版一份針對長者嘅主題報告，原來根據二○一六年中期人口統計，香港六十五歲以上長者人口已經有一百一十六萬，較二○○六年增加三成六。香港人口老齡化已成趨勢，長者人口佔整體比例，由二○○六年嘅百分之十二點四，上升到二○一六年百分之十五點九。我哋每十個人就有一點五位長者，其中百分之八住喺老人院或醫院，同時獨居長者嘅住戶數目亦急遽增加。

大家唔好以為長者唔同家人住就一定係壞事，睇返統計資料，香港居家長者當中，住喺私人房屋嘅佔四成三，當中大部分係自置居所而且無按揭或貸款。而且新一代長者教育程度逐漸改善，擁有中學或以上教育程度長者比例由二○○六年百分之二十五顯著上升至二○一六年嘅近百分之四十，擁有專上學歷嘅比例亦接近一成。

安老服務機構睇準新一代較富裕長者對高端護老院舍嘅需求，紛紛推出質素更高嘅設施。好似我早排去參觀位於元朗Yoho Mall嘅松齡雅苑，就係松齡護老集團（1989）嘅高端院舍。松齡係本地第二大私營安老院舍營運商，喺香港已經設有八間參與政府改善買位計劃嘅安老院舍，全部屬於最高等級嘅甲一級，而最新嘅松齡雅苑面積逾三萬三千平方呎，只提供六十八個安老宿位，除咗單人房，仲有家庭式入住，有自己嘅廳，更有家居感覺。

地方咁大宿位咁少，原因係嗰度有好多設施，好似迷你影院、髮型屋、圖書館、室內花園等等，連禪堂都有，照顧埋佛系老友記。事實上，新一代長者要求更個人化嘅服務，護老唔再係照顧起居飲食咁簡單，帶我參觀嘅同事同我講，長者可以選擇管家服務，幫佢哋處理私人事務，好似買禮物畀孫仔孫女呢啲私人事都可以代為處理。長者亦可以自行點餐，選擇啱口味嘅食物。

松齡另一項嘗試，係以合資形式租用位於九龍城物業，發展綜合銀齡養生社區蔚盈軒。由院舍發展到社區，係為活躍長者而設計。好多老友記社交活躍，鍾意更大嘅生活圈子。物業總樓面面積八萬四千平方呎，有更大地方可以建立一個高端社區，裏面有護理安老院舍、分科診所，亦有為活躍退休人士而設嘅服務式住宅和會所，以及健康主題餐廳。

另外，公司早前投得位於南昌街嘅項目，將用嚟開設松齡雅軒，專門服務認知障礙長者，預料明年首季投入營運。

聯合國估計未來二十年內，全球老年人口將增至十一億，佔總人口百分之十三。老齡化唔單止喺香港出現，喺內地同樣發生，所以松齡亦部署進攻內地市場。銀髮經濟逐漸成長，二○一○年，全世界有二十三個國家老年人口消費市場規模超越青少年市場，到二○四○年，估計有近百個國家出現呢個情況。銀髮經濟實在不容忽視。